Raftónleikar yfirstaðnir

Eva Zöllner - Harmonikka Kristján Orri Sigurleifsson - Kontrabassi Hugi Guðmundsson - Rafhljóð Tónleikar okkar á Menningarnótt hér í Kaupmannahöfn eru yfirstaðnir. Við spiluðum prógrammið tvisvar, kl.21:30 og kl.23:00. Þetta var skemmtileg tilraun því alltaf þegar maður er búinn að spila tónleika þá hugsar maður ef ég bara gæti farið aftur upp á svið núna, þá myndi ég gera þetta betur. Sannleikurinn var hins vegar sá að ég spilaði alls ekkert betur, heldur ekki verr. Ég var ekki stressaður í seinna skiptið en það breytti engu um frammistöðuna. Það segir mér að maður eigi alls ekki að spá í stressinu eða skella einhverri skuld á stressið. Tónleikarnir gengu vel en í seinna skiptið var mikill umgangur, fólk að koma inn og út og það passaði alls ekki við prógrammið okkar sem var rólegt og íhugult. Eina lýsingin í kirkjunni voru kerti og lampar á nótnastatífunum. Við spiluðum bæði dúó og sóló stykki (ég var með 2 sólóverk sem voru með live electronic) en þegar annað okkar lék sóló verk þá slökkti hinn á statífalampanum sínum. Á milli allra verkana lékum við lítil verk eftir John Cage, þau hljóma eins og lítil jólalög, svona ca. 1 mínúta hvert stykki. Alltaf þegar þessi litlu Cage verk voru spiluð var varpað myndum upp á vegg sitt hvoru meginn við altarið. Myndirnar voru nærmyndir af ýmsum hlutum úr kirkjunni en kirkjan er frá 17.öld og með mikið af fallega útskornu skrauti.

En mikið rosalega var þetta gaman! :)